|
Tennisplausch in Prattele |
|
|
Am 24. Januar hett dr Alain wieder e Plauschtennisobe organisiert. Nach eme glainen Apéro sin d Tennisspieler zu de Doppelmätsch adrätte. Das Joor sin dr Ruedi, dr Walti, d Regina, dr Urs, dr Heinz, dr Beni, d Jeannine, dr Markus, d Susana, dr Alain, d Daniela, dr Beat, d Rahel, dr Marc, d Sara und dr Serafin mit vo dr Partie gsi.
Es isch mit harte Bandage um dr gälli Filzball kämpft worde. Wenn em Gegner e Superpunggt glungen isch, denn hett me applaudiert. Es isch ab de zum Dail verruggte Verrängige härzlig glache worde und s Resultat hett nummen am Rand interessiert. Dangge au em "Ballemaitli" Cristina :-).
Während em Spiel hett em Alain sie Schweschter und ihre Fründ, d Aurélie + dr Marc, scho an de Spaghetti und de Sossene umezauberet. Drzue hetts au none Salat mit feinem Dressing gä. Wär vom Ässe nonig gnueg ka hett, isch am Kueche-Tiramisu-Schoggimousse-Dessertbuffet richtig gsi. Und wär none weneli Tennis hett welle spiele, isch eifach nomol uff e Platz. Drzwüsche sin none baar Karte glopft worde und wo denn gar niemert me könne hett, hän die letschte Mohikaner no alles uffgruumt.
E grosse Dangg vo allne an Alain für s organisiere, koche … eifach für Alles!
(27.01.2009)
|
